პირველი სიყვარული - 22 მარტში 2010

ღმერთო, რუსთველის სული ჩაუდგი
მიჯნურს, ღვთის ტაძარს სატრფოსთვის მწირველს.
თბილისში ოქროს ძეგლი დაუდგით
პირველ კოცნას და სიყვარულს პირველს.
ნუ კოცნით ქალწულს უსიყვარულოდ,
გულს ცეცხლი გენთოთ გაღვივებული.
შეყვარებული ქალის ღიმილში
თვით სამყაროა გაღიმებული.
როცა პირველად სატრფოს კოცნიან,
ცაში ჩერდება ვარსკვლავთ კრებული.
მოდით, ვადიდოთ ბესიკის თასით
ქართველ მიჯნურთა დასი ქებული
მანონ ლესკოზე უფრო ლამაზი,
ნესტანზე უფრო შეყვარებული.
კვლავ მიჯნურთათვის რეკავს სიონი,
სდუმს მტკვრის ტალღები გარინდებული.
მოდის ახალი გალაქტიონი,
სულ სხვა მერიზე შეყვარებული.
მე თქვენს სიყვარულს სანთელს ავუნთებ,
იმდენჯერ ახდეს თქვენი ოცნება,
დედათბილისში რამდენ ქალწულის
ბაგეც პირველად დაიკოცნება.
შენ სვეტიცხოველს უარსაკიძე,
თუ უკვდავება გინდა სულისა.
გწამდეს,ხელახლა ქმნის ამ სამყაროს
სიმღერა პირველ სიყვარულისა....!