წკრიალებს, როგორ წკრიალებს,
ომებში წრთილი წინწალი,
აგ-მაგუგელმა ტირალმა
მიწას შეასვა ტინალი.
წვართამ გვიწია მწვართელებს,
წალიკას სუნი წაგვლეკავს,
ადრაგუნები გვამხობენ
ნა-ოსმალ-მონღოლ-ნალეკარს.
მაგრამ მახსოვს რომ თეთრია,
თეთრია ჩემი თეთრონი,
მახსოვს რომ მაღლა ღმერთია,
ღმერთის ვიწამე მე მგონი.
მართვე არწივის არ წივის,
განსაცდელს მედგრად უხვდება,
გასაცდენს, საზღვარს გასაცდენს,
ოსტატის ფუნჯი უხდება,
ოსტატის ფუნჯით, ფასკუნჯით,
გაცდები, საზღვარს გაცდები,
ცხრა ცას აცდები, საუნჯით,
ყველაზე დიდი გახდები.
სველია, როგორ სველია,
ჩემი თეთრონის ფაფარი,
ბნელია, ღამე ძნელია,
ბუჩქებში მოჩანს აფთარი.
თეთრია, როგორ თეთრია,
თეთრია ჩემი თეთრონი,
ღმერთია, მაღლა ღმერთია
და გზას გვიჩვენებს მე მგონი!
---------------------
წრთილი -- გაწვრთნილი
წინწალი--საკრავი ინსტრუმენტი
აგ-მაგუგი--გოგი და მაგოგი
ტირალი--მკვლელი
ტინალი-ტენალი--სისხლის ღვარი
წვართა--სასჯელი
წალიკა--ყველაზე მყრალსუნიანი მცენარე
ადრაგუნი--ყვავილი(წითელი ვარდი)
თეთრონი--აქ რწმენა |
