ჩვენ ბავშობიდან ერთ თამაშს ვთამაშობთ
ყველაზე რთული და მარტივი
თამაშია სიტყვობანა.
ყველაფერი კი ასე დაიწყო:
შენ რატომღაც სიტყვა "გოგოდ" გადაიქეცი
მე სიტყვა "ბიჭად".
და ორივემ ვისწავლეთ კითხვა.
მერე
შენ სიტყვა "ვითომ"? გახდი
მე კი - "ნამდვილად"!
რასაც მოჰყვა სიტყვა "თითქმის"
და ვერაფრით გახდა სიტყვა "ჩვენ"
მე სიბრაზისგან "დედამიწად" გადავიქეცი
რომ ვეღარსად დამმალვოდი
შენ კი მაშინვე
"საჩვენებელ თითად" იქეცი...
და ყოველთვის ასე მჯობნიდი...
მოდი დავზავდეთ
მე გავხდები დღეიდან სიტყვა "როგორ ხარ"
შენ - "არამიშავს"
და ამ სიტყვების სამყაროში
ყველაზე ხშირად შევხვდეთ ერთმანეთს.