ვზივარ დაღვრემით,
ველოდები პოლარულ ექსპრესს.
გთხოვთ, ქალიშვილო,
მომიტანოთ ერთი ესპრესო.
ერთბაშად ვამსხვრევ
შემოჩვეულ უსულო კერპებს,
სულში რომ ძვრება
და დროს გვართმევს საუკეთესოს.
ვხედავ ორივეს,
შენი ფიქრის ორივე მხარეს.
და ვეღარ ვხვდები
გკოცნი შენ, თუ ვკოცნი ორეულს.
მინაზე ქარი
მინანქარი
სილუეტს არხევს,
სარკეში ხატავს
ჩემს ლურჯ სხეულს
შენგან მორეულს.
რბილი ხელებით
თმაზე ისევ მომეფერები,
და სანამ ფიქრებს
გამიფანტავს
შენი შეხება,
გაფრინდებიან
თბილ ქვეყნებში
ჭრელი პეპლები,
ფრენა არ იცის
მხოლოდ ერთმა
ლურჯმა პეპელამ.
|
